من طرف شـيخ البلد الإثنين 20 أغسطس 2007, 3:07 pm
قصيدة ( أنا والزير )ل 00 أحمد فؤاد نجم
أنا والزير
ف يوم صحيت م النوم عطشان
جريت للزير
شربت كتير
ببص لتحت لقيت الأرض منبتة أشواك
أتارى الزير كان مخروم
عملت عبيط ورحت أنام
ملقتش النوم
ولقيت الشوك عمال بيذيد
عملت عبيط وسبت الدار ورحت أكمل نوم ف الغيط
ولما صحيت لقيت الشوك عمال بيزيد
كأنه النار عمال بيقيد
من خوفى جريت وأنا مفزوع
والريق ف الحلق مش مبلوع
جريت م الغيط لحد البيت
لقيت الشوك ممدود م البيت لحد الغيط
خطفت الفاس
لقيت حراس على حراس
بيجموا الشوك
ببلدوزرات وطيارات
وجه الحراس خدوا منى الفاس
ما لقتش سلاح غير حطة طوب
رفعت الطوب أدق بيه على بابى
قالولى أنت ارهابى
رفعت الأمر للحكام وللعزام
قالولى حقك أنت كلام
دى أرض الشوك
ده حق الشوك
بطول المد
د ورث الشوك أبوه عن جد
وقبضوا علية مسكونى
و فوسط ميدان رسمولى
أكون عبرة
ومسكوا رجلى وأديه وحضنوا المشنقة فية
وشدوا دراع لقتنى بموت
وعينى خلاص ما هيش شايفة
غير دمعة حزن ف عيونى
وودنى خلاص ما هيش سامعة
غير ضحكة اللى سرقونى
وشدوا دراع لقتنى بموت
بموت
وفجأة صحيت
لقيت راسى ف قلب الحيط
جريت للزير ف قلب البيت
لقيت الزير مش مخروم
حلفت يا عينى ما اشوف النوم
ولا اسلم نفسى لزير مخروم
و ح اتعلم من دلوقتى ح اتعلم
ادوق الشغل اموت مالشغل وابطل انى اتكلم
ولا اسيب نفسى للحراس
ولا ابيع فاسى لنبتة شوك
